കൊച്ചി: എറണാകുളം സെൻറ് മേരീസ് ബസിലിക്കയ്ക്ക് അകത്ത് ബുധനാഴ്ച മുതൽ സഭാനുഭൂലികളായ വിശ്വാസികൾ ആരംഭിച്ച പ്രതിഷേധ കൂട്ടായ്മ രണ്ടാം ദിവസവും പരിഹാരമില്ലാതെ തുടരുന്നു.വൺ ചർച്ച് വൺ കുർബാന മൂവ്മെന്റിന്റെ നേതൃത്വത്തിൽ വിശ്വാസികൾ ഉന്നയിച്ചിരിക്കുന്ന ആവശ്യങ്ങൾ നേടിയെടുക്കുന്നത് വരെ പ്രാർത്ഥന കൂട്ടായ്മ തുടരുമെന്ന്  ഭാരവാഹികൾ അറിയിച്ചു. ബസിലിക്കയിലെ കുർബാന സംബന്ധിച്ച തർക്ക വിഷയത്തിൽ 2024 ൽ അഡിഷണൽ മുൻസിപ് കോടതി ഉത്തരവ് നടപ്പിലാക്കുക, സഭയുടെ ആസ്ഥാന ദേവാലയത്തിൽ  ഔദ്യോഗിക കുർബാനമാത്രം നടത്തുക എന്നിവയാണ് പ്രതിഷേധക്കാരുടെ ആവശ്യങ്ങൾ.  വിശ്വാസികളുടെ ആവശ്യങ്ങൾ സംബന്ധിച്ച് രൂപത മേലധികാരികളും നിയമപാലകരും ചേർന്ന് രേഖാമൂലം ഉറപ്പ് നൽകാതെ സമരപരിപാടികൾ അവസാനിപ്പിക്കില്ലെന്ന ഉറച്ച നിലപാടിലാണ് പ്രതിക്ഷേധക്കാർ.  ഇനിയും ബസിലിക്കയെ സഭാ വിരുദ്ധരുടെ താവളമാക്കാൻ അനുവദിക്കില്ലെന്നും അവർ പറയുന്നു. ബുധനാഴ്ച മുതൽ ബസിലിക്കയിലെ കുർബാനയും മറ്റ് കർമ്മങ്ങളും തടസ്സപ്പെട്ടിരിക്കുകയാണ്.
 അതിരൂപതയുടെ വിവിധ ഭാഗങ്ങളിൽ നിന്നും സ്ത്രീകളടക്കമുള്ളവരാണ് ദേവാലയത്തിനകത്ത് വാതിലുകൾ പൂട്ടിയ ശേഷം   പ്രാർത്ഥനകൾ നടത്തുന്നത്. ഓരോ ദിവസവും പ്രതിഷേധ പരിപാടിയിൽ സഭാ സ്നേഹികളുടെ പങ്കാളിത്തം വർദ്ധിച്ചുവരുന്നുണ്ടെന്നും അതിനാൽ വരും ദിവസങ്ങളിൽ കൂട്ടായ്മ ശക്തിപ്പെടുമെന്നും ഭാരവാഹികളായ മത്തായി മുതിരേന്തി, ക്യാപ്റ്റൻ ടോം ജോസഫ്, ജോസഫ് പി. എബ്രഹാം, ജോൺസൺ കോനിക്കര, കുര്യാക്കോസ് പഴയ മഠം എന്നിവർ അറിയിച്ചു. ഇതിനിടെ ബസിലിക്ക കോമ്പൗണ്ടിനു പുറത്തുള്ള ആരാധന ചാപ്പലിൽ വികാരിയുടെ നേതൃത്വത്തിൽ ഇന്നലെ രാവിലെയും വൈകിട്ടും കുർബാന ഉണ്ടായിരുന്നു.

Photo Courtesy - Google